Koue vingers maar warm groete

9 Maart 2013 Goeie dag allemaal, familie en vriende, Dit is 6° maar ons beef behoorlik van die koue- ‘n Siberiese wind knou ons gruwelooslik af – na byna 3 weke geen reën nie ervaar ons nou sedert Donderdag ysige nat weer- Gewoonlik is dit redelik gematig as dit reen maar hierdie keer is ons met ‘n kort riem gevang- DIE WIND! Die affodille lyk te pragtig en bring sommer dadelik vreugde in jou hart as jy buite kom – al is dit koud is die helder geel klokkies ‘n wonderlike gesig! Ek was veronderstel om al my lemoen boompies uitteplant en die orgideë reg te sien, die groot plant het ‘n knol in die middel wat doodgegaan het en ek moet die hele spul opbreek wanneer die plant nie in blom is nie maar elke keer as ek sovér kom is daar reeds ‘n nuwe uitloopsel! Vanoggend is ons met die stank der stanke begroet want ‘n buurman het sy lande met slurrie bespreoi- hulle beweer dat die mense in die plateland die water besoedel met hul riool tenke maar nie een van daardie EU mense ervaar wat ons vandag moet ervaar nie – die spul beesmis wat vir maande in ‘n tenk gevrot het word nou as bemestting oor die velde gesprei – die reen kom en alles word in die riviere en stroompies in gespoel en nou kry die riool stelsels die skuld! Die dame van Frankryk wat aan bewind van die Mf staan het gister hier besoek afgelê en hierdie klomp ape al die lof toegeswaai vir die vordering wat Ierland gemaak het- niemand het haar vertel dat die helfte van ons jong mense die land verlaat het omdat daar nie werk is nie en die wat agtergebly het staan almal op die randjie van die afgrond- Sommige mense kan die drukking nie verwerk nie en neem hul en hul families se lewens en die banke leen jou nie ‘n sent nie- absoluut niks nie en die wat werklik hard werk moet vir die pensioene van die vorige regering se parlementslede betaal, hulle kry enorme pensioene en doen nog steeds ander werk ook – die onregverdigheid wat hier seëvier is hartverskeurend! Ek praat baie en moet liewer stilbly want ek het nog werk en word darem nie deur die staat betaal nie maar deur ‘n privaat maatskappy wat sy eie reels maak! My aftrede kom nader en ek sal moet aansoek doen om langer te bly werk want as jy nie ‘n volle 10 jaar PRSI betaal het nie kwalifiseer jy nie vir die bydraende staats pensioen nie! Ek sal 8 maande kort wees! My eerste salaris het ek in Maart 2004 ontvang –voor die tyd het ek net gewerk sonder vergoeding omdat ek in opleiding was! By die werk gaan dit hals oor kop- sommige nagte lyk dit of Noag die ark se deur oopgelos het en al die diere uitgekom het en sonder rigting rondmaal! Daar is glo 4 TRUSTs betrokke by die onderneming om die Noord Ierse mense te opereer teen ‘n spesiale aanbod wat MG ( die baas)uitgewerk het- ek wonder of hy regtig ‘n koste berekening gedoen voor hy hom hierin begewe het – die pasiente is veronderstel om hoogstens 2 nagte oortebly maar waar daar probleme was moes sommige vir meer as week oorbly. Die direkteur van Verpleging het uitgeloop! Ons dank die Vader dat ons albei gesond is en dat ek nog my nagtaak kan doen. Ek het ‘n probleem en ek werk daaraan om dit te oorkom maar telkens gee ek in en dit iswanneer hulle oplui en met ‘n benoude stem vra of ek kan help – dat ek elke keer ‘JA’ sê. Ek sou nou ‘n week afgewees het omdat ek 6 nagte gewerk het maar ek was nognie mooi wakker nie toe lui die foon en ek werk ‘n nag reg in die middel van my aftyd! Ek is ‘n idioot – ek weet, maar dit is nou maar so-ek kan nie NEE’ sê nie. Ons voëltjies sing so mooi in die heining soggens vroeg tot laat aand – die ‘black birds’ sing saans as dit donker word- ongelooflik mooi! Ons baba kat wat Lukas oor die foon as JET gedoop het kruip ook in die heining rond –hy is wilder as wild en kom eet saans as alles stil is – eet sommer die kos wat ons vir die Jakkalsies uitgooi- eintlik is hulle nie jakkalsies nie maar by die gebrek van ‘n ander woord noem ons hulle maar so? Vossies? Nee tog- maar in ieder geval hulle lyk uitstekend, pelse blink en hulle is spek vet- so ook die katte Pa en Kind! Ons het ‘n MINK( die woordeboek sê- Nerts-haha ) maar hierdie een was nog lewendig toe ‘n vragmotor hom voor ons hek tot die dood veroordeel het- hulle is byna, in die omgewing meer gevreesd as die jakkalsies want hulle byt die lammertjies dood. Elke boer is op die uitkyk vir die gevaarlike karnallie –hulle woon naby stroompies en riviere waarvan hier in ons omgewing genoeg is. Die gedoente met die Pous is ook aan die gang in die agtergrond – nie dat dit ons enigsins hinder nie maar dit het tog na vore gebring die kardinaal wat vir jare in Engeland op ongepaste wyse sy lewe gelei het! Môre is Sondag en ek sit in die bank- en nie voor die orggel nie- dit is Joy se beurt en ek het haar darem nou so vér dat sy helfte vinniger speeel as vantevore- soms moes ek 2x asemhaal voor die einde van die frase. Ons predikant soos gewoonlik ‘n uitstekende spreker en ‘n wonderlike siels voeder! Die foon het gelui en ek werk vanaand- dus moet ek nou my skrywe kort knip, Die kinders kom ook more nou weet ek nie of ek in die kerk sal kom sonder ‘n slapie nie! Verjaardae!Die 11de Nicola Josling, en die 14 de Jaco in Roodepoort ook klein Paul van Tweeling Paul en Hanlie Veels geluk aan julle . Ek weet nie of die posduif die nuus reg oorgedra het nie maar – ek dink daar is nog ‘n Oupa en Ouma naby die Limpopo in wording! Veels geluk! Ek moet nou vinnig groet! Al is my vingers nou bevrore die groete is warm! Bly versigtig, wees bedagsaam en ry veilig! Liefde groete Barry en Christina