Groete vanuit Ierland

20ste Maart 2010


Goeie dag almal, familie en vriende,

Lente het uiteindelik hier in Cranleymore gearriveer en dit stem ons baie plesierig en opgewonde! Lieflike lang dae met sonskyn! Oral loop die boompies uit en die verbrande toppies van die rooi Robin probeer hard om hul geskende hoofies weer te lig!
Die appeliefie se nuwe groen blaartjies is so helder en nuut ek kan nie ophou kyk nie! Die appel bloeisels het sommer in ‘n week begin knoppe maak en sal seker in die volgende paar dae oop wees. Die eerste affodille is oop en so ook ons orgidee!
Ons het ook ons eerste lente reen gehad en oral sien jy die groen gras deur die bruin beur en die ganse dink dis ‘n fees! Die weer het aansienlik verbeter en dit bring mee dat mense minder knorrig en mismoedig is, dit was ‘n ekstra lang winter!
Maandag is ons dag vir die tuin en alle ou hang mandjies sal in ere herstel word en al die vensterbank bakke gevul word!Die tulpe kom orals op. In Oktober het Barry die bolle iewers gekry en orals ingedruk nie wetende wat dit is nie en ek gee glad nie om nie want dit gaan so vrolik wees as alles in blom is!
Die nuus hier draai alles omtrent die kardinaal wat weier om te bedank(want dan is sy kans om dalk die Pous te word daarmee heen)Hy is betrokke by ongelooflike dinge met betrekking tot die kinder misbruik in die kerk ! Dis nie so seer dit wat hy gedoen het nie maar liewer dit wat hy NIE gedoen het nie! Ons wag nou almal in spanning vir die brief van die Pous met betrekking tot die Murphy verslag, maar niemand het ooit iets verkeerd gedoen nie en almal was hul hande in onskuld!
Dis Ierland teen Scotland(rugby) vanmiddag en almal is in rep en roer! Sal maar liewer nie kyk nie , dit is nie goed vir enige mens se bloeddruk nie!
Terug by die ganse! Hulle het ons nou goed in die war! Ons moes ons geslag verdeling nog eens weer hernu! Skielik is daar nog ‘n hen aan die lê en ons eier telling staan nou op 29 ! Barry moes eiers uit die nes van Madam verwyder want daar is nou so baie dat die kring te groot geraak het en ons het hulle op ‘n koel plek gebere tot tyd en wyl sy broeis raak en begin sit! Ons is eintlik op soek na ‘n broeis hoender hen om te help en sal terug gaan na man waar ons die ganse gekoop het want hy het alles op sy werf! Die eiers kan goed herken word want al drie die henne se eiers lyk anders!Ons is ook nou seker dat ons net een mannetjie het en hy is die baas verseker!
Ons het ook as aanvulling vir al die leggende gans henne hoender kos gekoop soos aanbeveel in die boek!
By die werk het ek Maandag byna omgekom na ‘n nag in die oue te huis gedeelte , dit was op alle gebiede ‘n uitdaging geestelik, liggamlik en breinsgewys! Ek het duidelik die jare verpas waar sulke harde fisiese werk aan die orde van die dag is!maak my besef dat ek nie meer 25 jr oud is nie, en dit was baie ontstellend want ‘n mens dink mos altyd jy word net ouer in jare en nie anders nie, maar na daardie nag is ek erg ontnugter!
Ek het nog nooit geskram vir harde werk nie maar om na 40 pasiente, waarvan 30 hoog versorgend is ,omtesien met net ‘n helper is nie ‘n grap nie!
Dankbaar kan ek sê dat ek terug is op orrel diens en sien oneindig daarna uit om môre weer voor die orrel inte skuif. Vergeet om te noem dat ons ‘n pragtige Hollandse gesin ryker geword het en hulle sing so lekker , ek het nog net dag gesê maar sal more met tee kans kry om meer van hulle uittevind!
Nou ja nuus is niks noemens waardig nie en soos Hessie sê, as julle nog lees, hoop ek dat die week wat voorle voorspoedig sal verloop!
Baie spesiale groete aan onse TAnte Poppie en ons hoop dat dit met haar so goed as moontlik gaan! OOk vra ek Paul in VDBijl om ons beste wense vir spoedige herstel aan sy moeder Anke oor te dra!
Ek het geen verjaardae in my boekie nie maar dit beteken nie dat daar dalk iemand ‘n jaar ouersword nie. Veels geluk aan almal.
Ons dink aan die droogte geteisterde gebiede en hoop dat reen sal val.
My opmerkings van veiligheid in SA en ontstellende nuus berigte is nie vir almal aanvaarbaar nie dus swyg ek!
Groete uit ‘n groen wordende Ierland!
Barry en Christina