17 April ‘10
Goeie dag almal,familie en vriende!
My huis is ‘n lushof met affodille,oral, elke vaas is vol en buite teen elke heining staan die opgewekte dapper klok blomme met hul gesiggies na die son gedraai!
Die son se strale word soggens vroeg deur die dou druppels in prisma kleure weergegee en vanoggend het die mooiste tulp oopgegaan! Git swart in die diepte,helder geel buite met ‘n randjie wat lyk of dit met die skêr versnipper is!Die stempel is spierwit!Ek het ‘n foto geneem maar het nie die regte lens om skerp genoeg fotos te neem nie!
Ons het ongelooflike mooi weer gehad sedert Sondag ,heerlike warm dae met briljante sonskyn. Blou lug en soms net ‘n briesie om ons te herinner dat ons naby aan die noordpool is!
Wat ‘n ellende met die uitlating van die vulkaan stof en al die lugruimtes gesluit! Diè wat hier is moet bly, tensy hulle met die veerbote na ander dele vertrek maar die hele Europa se lugruim is besoedel! Almal wat wil staak moes dit nou gedoen het dan kos dit die maatskappye nie dubbeld nie!
Hier het een van die grootste maatskappye die aftog moes blaas teen die aanstelling van administrateurs(iets soos likwideerders) wat die besigheid gaan oorneem! Duisende mense werk vir die maatskappy “Quinn” op alle gebiede,sement,beton,quarries,verpakking,assuransie,kar,huis,en medies,om maar net ‘n paar te noem,nie net hier nie maar ook in Noord Ierland en Engeland!
Nou ja, hy ,Sean Quinn het 37jr gelede met een vragmotor begin en was gedurende die Celtic Tiger be-invloed deur die magdom van geld en het aandele gekoop dat dit hop en nou het alles verlore gegaan en skuld hy die bank 1.3 biljoen!
Ek is maar bly ons is nie ryk nie want geld is ‘n euwel en met genade van Bo word ons daagliks ryklik geseёn sonder om uitspattig te leef en nog nooit hoef ons honger te gaan slaap het nie! Dank die Vader!
Alles is laat die groei aan die bome kom nou eers na vore en die verskillende kleure groen kan nou opgemerk word veral langs die hoofpaaie. Die kersie bome wat gewoonlik teen hierdie tyd swaar hang met die blomme staan nog in die tou om uit te loop!
Ons sierpruim boom het nou bloeisels aan, wit en pink want dit is twee bome wat jare gelede seker deur ‘n insek of voeltjie gekruis is met mekaar, die helfte van die boom het groen blare met wit bloeisels en die ander helfte donker rooi blare en pink bloeisels. Die rose het pragtig uitgeloop en ons gaan hopelik veel plesier van hulle hê! Ons het ook 2 ekstra roosbome gekoop wat belowe om bloedrooi rose te dra dwarsdeur die somer!
Ons wag naarstiglik op die koms van die swaeltjies, maar heelaas het ons nog nie een gesien nie,wie weet waar hulle is?
Ons nuwe tuinstel wat ons vir ‘n appel en ‘n ui by die veiling gekoop het is ‘n groot aanwins en ons geniet dit om in heerlike stoele buite te sit,ons moes altyd op sulke regop kerk bankies sit! Nou kan ons heerlik uitgestrek op ons nuwe(ou) stoele verkeer!
Ons hoop om ,as alles volgens plan verloop en dit die Here se wil is dat ons die oorgeblewe vensters in die huis sal vervang met dubbelglas vensters vir die behoud van warmte en ook ‘n ordentlike voordeur telaat insit! Dit word alles in een dag gedoen. Sien op teen die gemors maar sien ook daarna uit om ‘n ordentlike deur te he! Ons moet telkens ‘n skop gee om die deur ooptekry want as dit reen swel die ding tenspyte van die waarborg dat dit nie sal swel nie!( Die komper verander die woorde wat in Afrikaans soos in Engels gespel word sommer van self na die Engelse spelling en ek moet dus heeltyd op my hoede wees).
Ek moet eers iets korrigeer, Br Mendel het 79 jaar oud geword en nie 80 soos wat ek gedink het nie maar ons sal dus volgende jaar sy 80ste verjaardag vier!
Ek het geen ander verjaardae van familie aangeteken in my boekie nie net Amanda wat more, die 18de verjaar! El sal haar in Engels geluk wens! Ons wag ins spanning op die koms van die kleinkind,ek het op die ou manier die datum uitgewerk en hulle weet nou van beter! ‘n week uit! Die kleinding sal seker nou arriveer die eerste nag wat ek weer werk m.a.w. die 21ste! Ek het gelukkig my verlof baie geniet en het die beste weer gehad denkbaar!
Baie dankie aan Kathleen wat so ‘n interesante lekker laaaaang brief geskryf het, dit was heerlik om van al jul wedervaringe te lees en hoop dat die tyd na die koms van jul dogter ook sommer vinnig sal verby gaan!
Die wat nie belangstel in die gans storie kan nou maar ‘exit’ Dit gaan julle goed!
Prins Scruffie,hy verdien die title ‘Prins’ nadat hy ‘n metamorfose ondergaan het! Hy is nou koning en jaag ons behoortlik met gruwel oё en ‘n gehiss van die onderwereld weg as ons net naby sy vrouens kom!
Hy is nou skoon en vet en pragtig! Vol karakter en streke!
Ons het ook sedert Woensdag en Donderdag 2 henne wat op die eiers sit , Die een ganshen by name van Ruthie het net Wonesdag oggend besluit dit is nou sulke tyd en haar stewig op die een nes gevestig. Sy is nou in ‘n kampie van haar eie waar haar kos en water is ,ook waar sy kan strek en kyk hoe die lewe buite lyk ,sy bly egter net ‘n paar minute buite en gaan dan weer dadelik in. Madam is die ander ganshen wat sit maar sy is so wispelturig soos ‘n vrou maar net kan wees! Sy hou nie daarvan om toegemaak te wees nie en breek behoorlik die afskorting af om uittekom en toe Barry dit versterk het ,vlieg sy toe oor die skeiding wat hy opgesit het , hoe weet ons nie maar gister skielik hoor ons hierdie allamintige lawaai en kyk ganse se kant toe om te sien sy is uit en reguit op pad water toe en sonder huiwer duik sy in en swem te heerlik rond! Sy wou onder dood nie weer ingaan nie en dit kan nie goed wees vir die eiers nie maar uiteindelik het Barry die versperring weggeneem en sy is terug, Nou het ons haar gelos ,laat sy nou maar maak soos sy wil, hierdie gans kinders gee Barry grys hare en maak hom meer bles as wat hy is!
Nou loop Prins Scruffie net met 2 gans vroue buite rond, maar o wee moet nie prober naby kom nie ,hy sal jou som mer gryp!
Een van sy bywywe hou ook van die water en sy duik diep en swem met groot lawaai rond ons moet elke keer as sy in die water was weer die tenk opvul want sy gaan so te kere dat die water vlak val en dan kan hulle nie so maklik uitklim nie!Ons het ‘n sak aartappels gekoop wat watering was en aangesien aartappels Barry se stapel voedsel is moet dit net van die beste wees maar so tussen deur het ons opgemerk dat hulle baie van die aartappels skille hou wat ons uitgooi, (ons bak die aartappels met skil en al in die oond) dus het die sak aartappels op die stoof geland en hulle kry toe 3x aartappels as lekkerny, Die warm aartappels vat die koek hulle bekke brand maar hulle eet dat dit gons! Die koue aartappels kry nie soveel aftrek nie! Hulle is ook baie lieef vir appelskille en die binneklant van my klaar ge-ete pomelo 1/2te elke more!
Daar het julle nou die laaste gebeure soos en met 1nm vandag!
Ons dink aan Kobus en Haya sal jy asb laat weet wanneer die operasie gaan plaas vind! Barry gaan vir ‘n volledige kardiese ondersoek want hy het die laaste paar weke telkens gekla van kortasem en benoudgheid in die borskas. Hy presenteer ook met ‘n onreelmatige polssalg wat hy nooit van te vore gehad het nie!Dus word hy die 29ste vir die dag opgeneem! Die gehoor probleem was toe ‘n verharde was bal wat sy gehoor verduister het en ons is nou besig met warm olyfolie, Cerumol en Waxoll die ding sag te maak en dan sal die dokter die ooruispoeling doen sodat ek nie weer beskuldig kan word nie! Na die laaste uitspoeling was hy heeltemaal doof want die vloeistof het agter die bal was gevange gebly! En ek moes omtrent les opse!
Ons dink aan almal wat op plase woon, mag dit reen waar dit droog is, mag die oeste goed verloop, hoop die eiertrok werk weer!
Onthou jul eie veiligheid as mees belangrik, sluit die deure en hou jul oё oop!
Ons groet vanuit ‘n heerlike sonnige Cranleymore( weet nie vir hoe lank nie)
Die Dunnes
Subscribe to:
Post Comments (Atom)
No comments:
Post a Comment