Groete vanuit Cranleymore

26 September’11

Goeie dag, familie en vriende,
Die briefie is ‘n paar dae laat maar so baie het gebeur dat dit regtig nie saak maak nie. Via Gerlof se brief verneem ons dat die Van Marles nou ook groot ouers is en nou sal hul die vreugdes van Ouma en Oupa beleef! Veels geluk aan Jaco en Stenelle met aankoms van jul baba en dan ook veels geluk aan al die nuwe Oupas en Oumas! Ons hoop om volle besonderhede eersdaags te ontvang!
Gerlof se weermanne en ons weervroue voorspel eienaardige dinge soos vroeë sneeu maar ook ‘n Indiese somer voor die sneeu kom! Temperature van bo 25° word vir die suide van Engeland voorspel en hier by ons netso bo 20° maar as ons moet oordeel aan vandag se temperatuur dan sal daar ‘n wonderwerk in die werkinge moet wees want dit het nie vandag hoër as 12° gestyg nie. Reën as afwisseling is doodgewoon. Die wind is geniepsig en jou hande word sommer gou koud as jy hulle buite los! Die blare val nou vinnig en die kleur skemas is besonders soos dit altyd gedurende herfs is, alle kleure vanaf donker roesbruin tot warm geel.
Ons hanekamme lyk nou mooier as gedurende die hele somer en die helder rooi bring pragtig kleur in die afbrekende somer blomkleure. Die begonias het ons totale bewondering nodig want hulle blom nou 6 mnde en lyk nog steeds mooi! Die rose het so iets van ‘n laat drag rose wat pragtig lyk en ek het seker nou die laaste van die pronkertjies gepluk!
Gister was ons Oes gedenk diens en die hele kerk was vol dalias van wit tot donker rooi byna pers en alles tussenin- ongelooflik mooi! Die kerk het pragtig gelyk en natuurlik was dit die beste dag van my week! Elke hoekie en lysie was gevul met vrugte en groente uit die gemeentelede se tuine-,gerwe van koring gebind soos in die jare her! 110 in getal miskien dink julle dat dit nie juis baie mense is nie maar vir ons gemeente wat hoofsaaklik uit ouer lui bestaan en miskien 20 in getal bereik, is dit ‘n allamintige groot klomp mense. Die orgel diens is deur Joy en myself gehanteer- 4 van my 12 voorgestede Psalme en Gesange was gesing en ek was baie in my skik! Barry het die skrifvoorlesing gedoen en soos altyd word hy vreeslik geprys omdat hy baie duidelik en helder lees-en al die hardhorendes kan hom goed hoor en die feit dat hy deel is van die Protestante kerk bring groot dankbaarheid en maak my baie trots!
Ons het die dankdiens met sang en musiek gevier.Die besoekende predikant het ‘n baie moderne boodskap gebring maar baie indrukwekkend-maar die kersie op die koek naas die heerlike klank wat uit die kerk opgestyg het was die eetgoed! Die ou skool gebou waar meeste van die ouer mense skool gegaan het in die laat 1920’s is gerestoureer in die afgelope 5 mnde met geld wat nagelaat is deur die buurplaas se eienaar-nie eers ‘n lid van die kerk nie maar hulle het altyd na die oes gedenkdiens toe gekom. Nou ja ons het koek vir die res van die jaar maar ek vrees die voeëls sal meeste daarvan verorber!
Ons het ook die wonderlike ervaring gehad van klein voetstappies in die huis,”Opa” soos Lukas, Barry noem, is ‘n diebare klein seuntjie volstreke en slimmer as die houtjie van die galg-skielik klink die uitdrukking baie snaaks, nietemin hy is nie op sy ‘bek’ geval nie en praat aanmekaar, elke woord duidelik uitgespreek bitter min baba woorde en herhaal wat hy foneties hoor. Dit was die eerste keer dat hulle oorgeslaap het en hy het sonder probleem in sy kamp kot gaan slaap en eers die volgende oggend ¼ voor 7 wakker geword! Finbarr kon nie gaan slaap nie want een van hul klante se webblad het die geesgegaf en hy moes deur die nag werk om alles weer in orde te kry- en om nader aan die ellende tewees is hulle toe maar na ‘n vol Ierse ontbyt, huis toe. Dit was nogtans baie lekker om hulle hier te hê. Jy moet oë in jou agterkop hê want alles word ge-inspekteur ,elke kas word oopgemaak en uitgepak- en die wasmasjien het ‘n groot aantrekkinskrag gehad en die klein vingertjies kan so maklik in die knyp kom! Sy ‘Opa’ is die mees wonderlikste ding en as hy hom nie kan sien nie roep hy luid ‘Opa’!!!
Nou ja, die naglewe in Cranleymore het met rasse skrede vergroot. Blackie, Professor, die 2 katte en die 2 jakkalsies het ‘n maatjie bygekry ‘n krimpvarkie-hy is te pragtig en eet alles wat hy as oorskiet op die gras kan vind. Professor en die jakkalsies sit langs mekaar en eet ,dis nou die grys strepies kat maar Blackie is die koning en as hy in die nabyheid is bly al die ander op ‘n afstand!
Die swaeltjies het nog gister deur die lug geswiep en hulle vertrek datum is seker baie naby! Die ander deurdiejaar voëltjies begin nou soek na hulle grondboontjies maar hulle sal eers volgende Maandag begin ekstra voedsel kry!
Die verkiesing van ‘n nuwe President vir Ierland is besig om momentum te kry- alles wat onguur is word nou uit die klosset gegrawe en elkeen moet net verdedig- dit is ongelooflik dat ons ‘n verkiesing gehad het en ‘n nuwe politieke party is aan bewind maar, oo weë! Dit is moeilik om te besluit wie is slegter! Sowat van geld mors is ongelooflik! Die gesondheidsdienste is in Chaos. Geld sake dwarsoor die Europese gebied is in groot gevaar en nog steeds gaan hulle voort met ‘gravy train’ salarisse.
Ek is vir 2 weke met vakansie en is dankbaar vir ‘n kans om weer kragte te herwin-net ‘n akkreditassie vergadering môre middag ,net om dinge effe te vertraag- ons beplan om Vrydag Enniskillen toe te gaan , NI, daar is ‘n groot antieke veiling en omdat dit altyd ‘n baie gesellige uitstappie is doen ons dit alles ineen-besigtig die goedere en indien daar iets is waar ons in belangstel sal ons oorbly!
Nou ja ek het geen verdere nuus nie.
Jul veiligheid is altyd vir ons van groot belang!
Hou die deure gesluit en wees altyd versigtig!
Liefde groete vanuit Cranleymore waar die winter met ‘n ompad, nader kruip.
Barry & Christina