Skielike winter groete

Saterdag 27 Oktober’12 Goeie Dag allemaal, familie en vriende, 2 briewe is een week is ongehoort! Maar ek mag dalk nie Dinsdag hier wees om te skryf nie. Ongenadiglik hard, is ons vanoggend die diep kant ingestamp, ‘n mens hoop altyd tog dat dit so lank as moontlik sal weg bly maar ‘n hele 10 dae vroeër as verlede jaar, het die temperatuur tot -2° geval en die wêreld was wit. Die son het uiteindelik sy kop oor die horison gestoot en stadig maar seker het die groen gras weer sy verskyning gemaak. Dit is soos die korsie van ‘n varsgebakte brood- krakende koud maar mooi en die wonderlikste van alles is dat dit droog is! Gister was ook ‘n mooi dag maar die noorde wind het met mening gewaai en ons het na middagete besluit om ons moue op te rol en gou vir ou laas die gras te sny- Barry het vroeër in die jaar onkruiddoder, mos doder en bemesting stof op die gras gestrooi met die rollerwaentjie. Hy het net geloop waar die mos die ergste was maar dis nou presies daar waar die gras met mening groei –groener is van kleur en maklik die plek in ‘n oerwoud kan laat verander. Dus, goed gepamper teen die koue, handskoene aan, durf ons toe die spesifieke area aan en nou lyk dit goed en sal hou tot die eerste sny volgende jaar. Ons het ook vir ou laas buite in die pad gesny –dit maak tog ‘n verskil en mense wat ek ken merk altyd op as die gras gesny is en sê hoe goed dit lyk! Die pad is ontsettend besig en jy moet jou draai ken- altyd wag en seker maak daar is niks aan die kom nie- en met Barry se geel gestreepte hoogs sienende oorjak het hy korte miete van die lang gras buite gemaak, verskeie kere moes hy die masjien omkantel om die dik nog natterig gras uitgegrawe en siedaar, ‘n netjiese aansig! Die tuin is besig om sy laaste kleure te vertoon- die Lupins lyk nog pragtig en die kappertjies is aan die afneem! Die rose is klaar geblom alhoewel ek nog ‘n pragtige verdwaalde roos in die verste punt van die ondervled gekry het- hy staan nou in ‘n vaas op die vensterbank van die kombuis. Daar is altyd die lief-haat verhouding in die winter aan die gang- koud en droog met ‘n flou ou sonnetjie of warmer ,bewolkd en soms reën. Die nattigheid staan my nie aan nie en maak al my skarniere seer-dus vandag is so in my kraal! Ons sal van Maandag af vuur begin maak- die skoorsteen is skoongemaak die nuwe tou aan die binnekant van die stoof deur is geplak en sit goed stewig ,ek het selfs die stoof gepolitoer – dit wil gedoen word! Sedert my vorige skrywe het niks noemenswaardig gebeur nie! Finbarr en familie trek volgende naweek in hul groot huis in, net om die draai van waar hulle nou woon en almal sien daarna uit. Die plek is ongemeubileerd en hulle soek nou naarstiglik na goeie meubels- iets wat vir ‘n leeftyd sal hou! Hy het van iewers vandaan 5 jong manne wat gaan help –ek hoop dit gaan voorspoedig – die grootste en meeste is meneer Lukas se speel kamer-waar hy vir lang rukke in kan wegraak, verdiep in iets. Hy kan die Ipad met groot vertroue hanteer en ek weet nie eers hoe die ding lyk nie- sien dit net op advertensies op TV. Finbarr se besigheid wat “Socialworkz” insluit was blykbaar in die SA Parlement genoem vir hul uitstaande werk op die web vir die SAfrikaanse Ambasade hier in Ierland. Weet nou nie van hoeveel waarde dit is nie maar darem! Die moontlikheid bestaan dat hy dan vir al die Ambasades van SA wêreldwyd hul webblaaie sal ontwikkel! As die weer hou hoop ons om volgende week ‘n toggie na die weskus van Ierland te onderneem – maar dit is nog net praat! Dit help ook nie om na ‘n plek te gaan en in die hotel te sit omdat die weer te guur is nie! Môre , D V speel ek die orgel en ons sien almal uit na die volgende Sondag wanneer ons eie predikant weer vir ons die Woord van God sal bring! Skielik het hierdie komper nou ‘n ander formaat begin gebruik wonder wat het ek nou weer raakgeslaan met die vingers. Ons dier besoekers wat hoofsaaklik uit voeltjies,baie soorte,tortel duifies,Blackie die kat en ander bestaan-verskaf ons oneindig baie vreugde en plesier. Baie dankie aan almal wat so gereeld my briewe be-antwoord –ek waardeer dit oneindig. Joy in Brisbane vertrek eersdaags na SA vir troues en verjaardae en ek hoop haar reis is veilig en dat sy haar tyd met die familie baie sal geniet! Dit is altyd so lekker om Gerlof se brief te lees want dit blyk altyd goed te gaan met hulle! Wonder of die kinders al werk gekry het!? Ons dink baie spesiaal aan Sandra se Ma wat baie siek is en hoop dat Sandra die tydjie in SA tot groot waarde sal vind! Isabel jou briefies is altyd baie welkom en so die van Nine!(Snr) Daar is ander mense wat ons gereeld in ons gebede onthou –hulle is Nanette en Brandon, Nine, Stefan en baba Christiaan. Almal wat nie gesond is nie en die wat wag vir operasies ens. Al die ander wat eksamens skryf- alles van die beste vir julle! Verjaardae: Geniet die dag - almal wat wel gedurende die week verjaar- ek het geen naam in my boekie nie! Wanneer is Mader se verjaardag? Pauli of Gerlof laat my asb weet! Met die temperatuur tussen 7 en 8 ° en die skaam sonnetjie wat elke nou en dan agter die wolke verdwyn groet ons dan vanuit Cranleymore! Wees tog altyd versigtig- tuis, op pad en waar julle jul ook bevind! Barry en Christina .