Koue groete vanaf warm harte

Saterdag 13 April’13 Goeie dag allemaal, Familie en vriende! Daar kom ‘n stadium in jou lewe, elke nou en dan, wanneer jy ‘n besluit moet neem wat jy liewer nie sou wou neem nie maar....dit moet. So kom dit toe dat Barry gedurende die week besluit het om die bal aan die rol te sit en ons het verlede week Plafon hout gesoek en Kanadese ingevoerde hout gekry teen ‘n baie goeie prys en omdat jy dit kontant oor die hek doen betaal jy geen VAT nie wat hier teen 23.5% gereken word. Ure nadat ons bevestig het dat ons wel die hout sal neem bel die vervoerders op -Hulle is op pad met die hout ! Gou bank toe want ons het nie daardie soort kontant by ons nie en hier mag jy net €400 op ‘n slag uit die bank neem , hulle sal moet terugkom vir die res! Die hout is Donderdag laat middag, na 6nm afgelaai en is nou in ons voorhuis! Eintlik ons sitkamer! Die Poolse werker wat ons altyd uitgehelp het is nêrens te vinde , en marthie se kontakte kon nie dadelik begin nie en so Barry lui sy ou vriend ( hahaha) geen tand in sy mond en so maer soos ‘n riet met 4 seuns wat almal op die Doll is. Hulle hande staan vir niks verkeerd nie en het ‘n vorige keer uitgehelp en Barry betaal hulle met dinge- ou wasmasjiene ens. Hierdie keer sal hulle vir geld werk en bevestig dat hulle Maandag 9vm hier sal wees. Barry moes intussen uitvind waar die hout planke in die dak is en begin om die rante afte haal –skieliik verander my kombuis in ‘n stofkamer met sement stukkies en rubbish orals! Hy is steeds besig om presies te merk waar die planke loop want die nuwe plafon van hierdie spesiale hout word nou ‘n werklikheid. Hy werk met sy hande bo sy kop en dit maak hom baie moeg maar van hoor is min! Hy stop darem so elke nou en dan!O Ja die kardioloog het hom amptelik ontslaan –hy is so goed as wat hy ooit sal wees en moet maar die pilletjies drink! Intussen waai die wind en is bitter koud- dit wil reen maar weet ook nie meer hoe om dit te doen nie want in 6 weke het ons 15 mm reen gehad en bevind ons nou in ‘n droogte tydperk wat angswekkende afmetings begin aanneem! Die beeste se winter voorraad is op want die winter het vir ewig aangehou en omdat dit die koudste winter sedert 1962 is was daar geen grondhitte vir groei nie! Die velde staan bruin en almal en alles kry swaar- In die land waar water inoorvloed is heers daar nou droogte.Die vee-arts het vanmôre verduidelik wat die effek van min sonskyn op die diere het veral die beeste en melkkoeie!Dit is ‘n wrede kringloop van die boer wat nie geld het nie- die korporasie wat byvoeding op krediet moet voorsien en die vee-arts ! Die dag temerature is nie te sleg nie moet net nie in die wind kom nie! Die nagte is nog bitter koud! Ons het ook vandag besluit dat gisteraand die laaste aand was wat ons vuurgemaak het en sal as ons baie koud kry die olie verwarmer aansit anders sit ons maar met ons kombersies oor ons voor die TV. Ons baba kat verdwyn en ons dag sy ma het hom kom haal maar toe hy die 2 de aand nie opdaag nie begin Barry soek en jou werklikwaar hy kry hom in die veld van die buurman waar hy met groot oë baie benoud vir Barry aanstaar- Duidelik het hy pyn en kannie beweeg nie- altans nie maklik nie! Dit is koud en ons hoop dat hy op ‘n manier tog beskerming vir die nag sal opsoek! Laat aand gaan kyk Barry weer en hy is nie meer daar nie! Gister middag vind hy hom in die oop skuur- ek wou kyk waar die besering is maar hy hinkepink met seer geskreeu agter alles in! Hy ken Barry beter want hy gee hom kos maar ek is nie in sy goeie boekies nie! Kon wel sien dat hy glad nie die regter agterbeen gebruik nie en die sleep! Ek was bang dat dit dalk inwendige beseirngs is en dat ons die IRSPA moet bel. Maar hy kan wel beweeg en ‘n kat het 9 lewens en nou is een op! Vanoggend kry Barry hom in ons onderveld en baie versigtig en stadig het ons nou die katjie in die donkiehuis met kos en warmte. Daar was ‘n dringende versoek van die ‘Bird Watchers’ en Fauna en Flora dat die mense asb tog nie moet ophou om die voëls te voer nie- baie van die voëls wat gewoonlik gedurende Maart /April arriveer het dood gegaan op pad hier na toe! Ons moes vinnig na die hardeware winkel maar het eers vir Karin ,een van ons SA vroutjies gewag wat vir my ‘n persentjie vir Lukas gebring het en baba wol van SA waar hulle vir ‘n paar weke op besoek was! Die groot slang rooi warm is baie indrukwekkend en die kleiner een pragtige kleure – ek hoop hy sal daarvan hou- hy is slang gek op die oomblik! Toe ons die hek uitry Longford toe was dit 9 grade –terwyl ons weg was het die weer ‘n U draai gemaak en toe ons terug kom reen dit en dit is 7 grade en ’n bitter koue wind het begin waai! Net sodra jy dink ‘nou gaan dit beter’ verwar die natuur jou hele gedagte gang en plons jou weer terug in die lang uitgerekte winter. Moes vinnig hardloop om die ¾ droeë wasgoed –nou natuurlik papsopnat van die lyn af te kry en in die droeër te plaas- Die Iere laat die wasgoed net daar hang tot dit eendag droog is! Ek is nog nie iers genoeg nie! Br Mendel ver jaar vandag en ek het reeds met hom in aanraking gewees via sms maar wil nogtans vir hom ‘n goeie jaar toewens! Amanda verjaar die 18de en ons nuwe baba word die 4de verwag . Lukas word 3jr die 23 ste en ons sal Dublin toe gaan die Saterdag van tevore want op die dag is dit vir die 3-4jariges en Sondag het ons ‘Songs of Praise’ diens by die kerk! Aan almal wat studeer , wat hard werk en wat swaar kry op allerhande wyses, siektes en pyne- ons dink aan julle en hoop dat Dit gou verby sal wees en dat alles vinnig na normaal sal terugkeer. Ons predikant is terug môre en ek is baie dankbaar –sal liewer niks sê oor verlede Sondag se fiasko nie! Ek kies die Psalme en Gesange met die gedagtes en die wete dat dit die 1ste Sondag na die opstanding van Chrustus is , maar nee hy praat oor David en Batsheba- .....................*******************. Terug in my tuin vir ‘n wyle – ek moet darem noem dat ek die dapperste affodille in Europa het- hulle begin nou uiteindelik blom Middel April!!!! Hulle waai verwoerd rond met die geniepsige wind en ten spyte van droogte en ellende bly hulle pragtig en vrolik! Dit was ook met groot opgewondenheid dat ek vanoggend die eerste teken van lewe in my druiwe stok gewaar het! As dit goed gaan plant ek 20 appel boompies uit Maandag en ook die 12 lemoen bome hulle moet nou stamme ontwikkel en begin groei vir uitruil skema by my tuin winkel-alles groei van pitte!!! By die werk gaan dit erg rustig- hulle onderhandel nog die tekening van die volgende kontrak vir duisende pasiente wat van die Noorde af geopereer moet word, intussen gaan dinge baie rustig en ons kan almal asem haal! Die ding met die Indier vrou wat dood is aan sepsis nadat die Dr en Hospitaal geweier het om ‘n aborsie toetelaat op 17 weke ,tenspyte van die feit dat haar vrugwater gebreek het en sy al sieker geword het- en toe die foetus dood is –is sy inderhaas teater toe geneem en vandaar na die intensiewe eenheid want toe is sy al baie siek – maak groot opslae orals. Die arme verpleegster wat in ‘n gesprek die waarheid aan die pasient meegedeel het staan nou beskuldigd aan ’ Your remark went all over the world’! maar.....Die waarheid maak seer! “ It is a Catholic Country......’Hulle het so drooggemaak met haar verpleeging dit is skrikwekkend! Ek het nou genoeg gesels- Lees altyd lekker aan Gerlof se beleweninge, ook hopende dat Arnolda en Garth hul besoek aan SA sal geniet!baie dankie ook aan isabel wat gereeld van haar laat hoor en ons hoop dat die groot avontuur wat op Georg wag ‘n wonderlike ervaring vir hom gaan wees- Die eerste Eloff in Rusland!!!!Hoop dat dit ook goed gaan met Nine – baie dankie vir jou lekker lees briefies! Baie dankie ook aan almal wat so gereeld op my skrywe antwoord- dit word opreg waardeer. Ek groet vanuit ‘n nat , koue bedremmelde Cranleymore waar die harte warm klop! Wees altyd versigtig en gereed! Ry versigtig! Barry en Christina